TO:DÍ BÉRÉG MÉ:JUP

✒️ Lakhi Prasad Doley

Sí:lungé:lé sumnyo ngírra dung,

Édém talla Dumsungé berraddung.

Porok péra kítí:gbo Kuri bumna dung,

Édém anna Péra Porok tumabdung.

Ané abuk yubko:do Oi:bí yummíndung,

Yumé yo:ra kítí:gbo mé:nambí tunna dung.

Tunggdoé: Pík: kapdung,

Oméké duktad gía:dung.

Anu yamné a:dung,

Rokompé ki:par bé:dung.

Anu magbo a:dung,

Nampon chigaret tí:dung.

Anu magbo a:dung,

Nangol gí:di poddung.

Okum dukyi:do Tanké mari:-ri:dung,

Ta:to ya:yo íkí:dla kaba:dung,

Okum dukyi:do Tangké mari:-ri:dung,

Ta:to ya:yok urom- ambínko pissakdung.

Okum mí:dumdo Udu budu kapdung,

Okum érang yallom bomabdung,

Ísí:-sí:ludo Mílongé kudung,

Do:lung réngamlo gu:nyi:ngé a:dung.

Asi-sirki:lo gí:yoka, pomsi:pé sipéké,

Ké:né ru:yi:lo gí:yoka, Épom bompéké.

Mirém Magbopé iyoka, Pagbo émpéké.

Ommém mirémno biyoka, Pagné émpéké.

Olum Ao:om lui:rlang, mé:jub-jubyépé,

Olum Ommém lui:rlang, Okum bomna do:yépé.