LÍGANG, NO NGOK ASIN RÍGA:SOK MÍMBÍR BÍRNÉ BÍRDUGÉ

✍️Tuladoi P. Taíd

Lígang, No ngok asin ríga:sok mímbír bírné bírdugé

No ngok asin ríga:sém gené gelubla í:rdí í:rboné

No ngok píkagné alí:lok sulli: rígangém asi píju píjula mé:po mé:la lígang lígboné

Nok bírdug ésaré sarbomdag otsur otsurné gené í:rdí í:rla í:rla

Lígang, no ngok asin ríga:sok mímbír bírné bírdugé

Mo:písok ísíng-ílíngém gené galuk pídlíg pídlígla í:rdí í:rné gené bírdugé

Nokkokki ngo í:rdí í:rdo kénong tí:língém

Nokkokki ngo a:mrag ragdo, po:ro po:don tonna po:rag po:piném

Nokkokki ngo réngam dírbí bírdo po:bor po:ríg kadla: kadla

Nokkokki ngo du:né me:né minom mibo bodo loyo tosag tosagla

Nokkokki ngo dakor kordo ngok réngam uji yallom sígla: sígla

Lígangé líganga no ngok kéra:lo a:tíla du:bilang

No ngok kéra:pé a:ma:yemílo ngok asin mo:písé kémmo ru:rubdag

No a:lang dítag dítaglo bírdug bírduglo gené gebilang í:rdí í:rbilang

No ngok réngam turténg kang-gang dumsig migmo

Nok gégo bomgolo nambu:dag réngamsok aíké kangkin aro arí:é

Mo:píso no oko mo:dumloi du:dag-gom no ngoluk réngam kangkin dumsígé

Lígang, no ngok asin ríga:sok mímbír bírné bírdugé.