KO:TANÉ ÉRANG

✒️Mg. Gulap Bori

Do:lu:dok ko:taru:né éra:dok tani:kídí:dé yumé apiném dosumla aí-aíké soyarém pusí:-pumola du:bong; nébíng annyidé dígubgampé doa:la kosag akko:do dobosula dotíla dung. Mírbumna mírné do:mírém pésogéla étku:lo gíangkuné ríang aodé okumdo:pé pínga:dannai ludung, "Asisé téngasuma:pé idung, siyum jo:pongé tojíngkandag. Motauriyém bitsodmílo mí:dumlo:péi lumsa:yépé." Gíta-gímasula luta-lumasuné ojí:né aodok gomukko pa:ma:la taudodémpag éra:dé duktaksula maropkang. Sékké soyarlo:sin ojí:dé kamang. Odo ayirardo dobur díngkampé pédongé oangkang. Kaptag-ri:takko arangí:do koktogdok kosag akko:lo dobosuné nébíng annyidé yapkurdok moge:la du:né yabgodém kangge:la kéngaradala du:pakkang.