BURÍKSULANGKA

✍️ Srishti Rani Taid(Ru:yum)

Dung ngo a:né asi bitté:do Ka:pa:mang si:lopé among rísuém Lubitéi ajona ang dígla ba:bumé Tadmang se:kosin ngoluk ngasodém Ka:téi ru:né-pínéno Do:nyi-Po:lokémpé A:pén adílo ajéng-jengko kama:dopé. Mabitéi ngolum ponané ukumko Na:néké agomsém lo:dípé lutíngko, Radma:bong ngoluké kuyab-yoktungé Dorma:bong ímé métungé. Lo:dísém pédong ésaré saryuddung Írga:motéi ngoluk okum méromém. Índu:bong génam galug-gasoré Angkir biddopé ísíng-ílíng kurkolo Bograng arígém lo:dísém méngkolo. Sutkanbila:mang o:ba:bubí Aríg iko among ríssém Kabdung ngokké bíro-bírmangé Anu bélamém mala. Sisa:dung ngoluké ajjiouné ajoné Gejigné ma:nyingém ma:la Gídung ajeng kama:né du:téngém mé:la. Du:néi se:kai mé:jub mé:néko Asin díglígla ka:si- la:si:néko, Du:míl sékkai "ayang abungko" Ko:ríg sutéika peri: ollungki Buríksulangka aín alakki.