ALI: A:YE LÍGANG

✍️Pabitra Panggíng

Ali: a:ye lígangé

Ali: a:ye lígangé 

Ginmur po:lolok sarbug sarné ésaré

Gené otsuré biréla birkurra birnané ésaré

Mé:dírkolokké mé:pokolo:pé

Ngosotkolokké ngatursukolo:pé

Gínané anu dítaglok anu légoé

Éddíng ngoluk ali: a:ye lígangé 

Éddíng ngoluk gí:dí sípíé

Ali: a:ye lígangé 

Ali: a:ye lígangé 

Nampo namanné kadbug kadnam 

Po:ro apongki píar pínamé

Ayang kunténg kunté:la kunnam

Purang apinki kénong ménnané

Pi:ro ígyed ígyedla

Mo:pí amír tagbur tagla tagla 

Amli: pidbug pidgodé 

A:ye legod leturé

Éddíng ngoluk ríglam alamé

Éddíng ngoluk gí:dí sípíé

Éddíng ngoluk ali: a:ye lígangé

Ali: a:ye lígangé 

Ali: a:ye lígangé 

Mibu galug gonro ugon 

Odokké érkogé géngíré géyumé

Ya:me: me:yumé démdum luppi: man-yumé

Asiné to:yi: to:sa:la réduppé dubdopé so:yumé

Gero ege ri:bi gaseng gapa gare: 

Géyumé bomyumé

Odokké yirnamé yiryumé 

Mímbíré bíryumé gumrag so:yumé

Jé:la ni:tom tomyumé

Mé:dír urpag urpagla

Ngasod ní:pag ní:pagla

Rígdum gumrag ríkkong gumrag

Kekonélok gumrag kekonsokké gumrag

Do:mír yarié gumrag rag 

Éddíng ngoluk gí:dí sípíé 

Éddíng ngoluk opín kangkiné

Éddíng ngoluk ali: a:ye lígangé

Ali: a:ye lígangé 

Ali: a:ye lígangé 

Asin ríkpum rígla rígla

Mé:po délu lu:moné

Ayang koksed kogla kogla 

Adí lékor korpí korboné

Démdum démla démla

Lo:bag démpag démnané

Ni:tom jé:la jé:la

Singag réngam jé:rob jé:nané

Éddíng ngoluk gí:dí sípíé

Éddíng ngoluk ali: a:ye lígangé

Éddíng ngoluk ali: a:ye lígangé.